ភ្នំពេញ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស សុខា បានបញ្ជាឱ្យរដ្ឋបាលខេត្តជាប់ព្រំដែនកម្ពុជា-ឡាវ និងកងកម្លាំងមានសមត្ថកិច្ចមួយចំនួនបញ្ឈប់រាល់ការចេញឯកសារឆ្លងដែនមិនប្រក្រតី និងបញ្ឈប់ការយកកម្រៃក្រៅផ្លូវការពីប្រជាពលរដ្ឋខ្មែរដែលធ្វើដំណើរចេញ-ចូលឆ្លងកាត់ព្រំដែនកម្ពុជា និងឡាវ។

ការសម្រេចនេះធ្វើឡើងក្រោយពីក្រសួងមហាផ្ទៃសង្កេតឃើញថាកងកម្លាំងមានសមត្ថកិច្ចមួយចំនួន នៅតែបន្តចេញលិខិតបើកផ្លូវ ប័ណ្ណឆ្លងដែន និងឯកសារឆ្លង់ដែនមិនប្រក្រតី ជូនប្រជាពលរដ្ឋខ្មែរប្រើប្រាស់ ឆ្លងកាត់ព្រំដែន ដែលប្រាសចាកអំពីស្មារតីនៃកិច្ចព្រមព្រៀង ច្បាប់ និងលិខិតបទដ្ឋានគតិយុត្តជាធរមាន ដែលបង្កផលប៉ះពាល់ដល់សន្តិសុខ សុវត្ថិភាព និងផលប្រយោជន៍ស្របច្បាប់របស់ប្រជាពលរដ្ឋខ្មែរ។

លោកអភិសន្តិបណ្ឌិត ស សុខា បានណែនាំឱ្យប្រជាពលរដ្ឋប្រើប្រាស់ប័ណ្ណព្រំដែនសម្រាប់ចេញ-ចូលឆ្លង កាត់ព្រំដែន នៅតាមច្រកទ្វារព្រំដែនដែលប្រទេសទាំងពីរបានទទួលស្គាល់ជាផ្លូវការ ដើម្បីធានាបាននូវសន្តិសុខ សុវត្ថិភាព និងការពារបាននូវប្រយោជន៍ស្របច្បាប់របស់ពួកគាត់។

លោករដ្ឋមន្ត្រីណែនាំឱ្យសមត្ថកិច្ចផ្សព្វផ្សាយ អប់រំ និងណែនាំដល់ប្រជាពលរដ្ឋឱ្យបានយល់ដឹងច្បាស់ពីអត្ថប្រយោជន៍ នៃការប្រើប្រាស់ប័ណ្ណព្រំដែន និងជំរុញឱ្យពួកគាត់មកដាក់ពាក្យស្នើសុំប័ណ្ណព្រំដែន កម្ពុជា-ឡាវ នៅអង្គភាពច្រកចេញ-ចូលតែមួយដែលមានទីតាំងនៅសាលាខេត្ត ឬទីតាំង ផ្សេងៗទៀតដែលកំណត់ដោយរដ្ឋបាលខេត្តសាមី។

ទន្ទឹមនឹងនេះ សមត្ថកិច្ចត្រូវគោរពតាមតួនាទីចាត់វិធានការពង្រឹងការគ្រប់គ្រងនិងការត្រួតពិនិត្យអ្នកដំណើរ ទំនិញ និងមធ្យោបាយ ចេញ-ចូលឆ្លងកាត់ព្រំដែន ដើម្បីបង្ការ ទប់ស្កាត់ និងបង្ក្រាបរាល់បទល្មើសឆ្លងដែនគ្រប់ ប្រភេទ ពិសេសបទល្មើសគ្រឿងញៀនឆ្លងកាត់ព្រំដែន ឧក្រិដ្ឋកម្មឆ្លងដែន និងការជួញដូរ មនុស្ស ដែលអាចបង្កផលប៉ះពាល់យ៉ាងធ្ងន់ធ្ងរដល់សន្តិសុខនិងសង្គមជាតិ៕